Pasian Zatmi te ni
Pasian zatmi te ni november 29/2022 Moelin Siangsawn pawlpi
Nuntaakna thu siangtho 194(vantung thupha)a neu 9 “a mau te kiangah pai in vantung lungdam na thu gen un"
Pasian zatmi te ni avei 27 cin na
Pasian Zatmi te a hong pai theih na ding in Pasian kamsang lian pipa Pau Cin Hau leitung mi te nuntaakna hon khia ding,nuntaakna khua mial sa te khempeuh khua a vak sak kik ding,leitung mite ki-it na tual niam semsem aa ki-it na a ki kim zolo,vatung Pasian gamnuam a ngah zolo,Pasian tawh a mang khawm theilo,Pasian dal sa bang aa a nungta theilo leitung mihing te tung ah pian leh khan a ki khek sak pa nuntaakna khuamial khua a vak sak kik pa leitung ah Pasian bawlsa nuntaakna ah sihna ding pan in hin kik na a hong pia pa Pasian tapa Pau Cin Hau a hong pai zawh siangsawn kum (164) a ma hong pai khit tak ciang in leitung mihing te in vantung thusiangtho phatakpi in zui nuamlo,zui theilo,deih bawl a hih man in Pasian a lung kimlo aa,Pasian tapa in leitung a hong nusiat ding ciang vangam ah a ciah kik ding ciang in ka nungsang ciang in Pasian deihna taktak zui zo aa puahzo zaw ding hi ci-in lungnuam in ka hong nusia ding hi.
Tua khit ciang in leitung mihing te in Pasian tawh ki ho thei hong om in Pasian deih kammal a hong gen thei om leh cin in Pasian tung ah thu tampi tak ki ngen in leitung ah ih deihna ciat ki pulak hi.kua hong pai ding hiam ci-in ki thei khol lo hi.a thei khol Pasian in a gen kholh sa te hong piang aa, 1968 july 10 ni-in hong suak aa Pasian hilh kik na hong pai a ki im zo nawnlo 1995 november kha 29 ni-in Pasian hilh kik na hong suak hi.
Tuni 2022 november kha 29 ni tak ciang in Pasian hilh kik na kum 27 cin ni hi.hih kum 27 cin na hun sung ah hilh kik na a ki pan Pasian hong sawl bang in nu pa ki ten sak na Pasian thu piak na tawh kop 14 hi.Pasian hilhkik na sung ah khasiangtho Pasian in a ma misiangtho te tawh lei leh van uk ding aa ama zat minam, teel minam te tawh na a sep khop,khasiangtho ii tel, teeltuam nu pa zatmi kum 27 cin kum tak ciang in tu tung aa a ki teng ding nu pa kop thum te tawh teeltuam nu pa kop 95 hi.1995 kum aa zatmi te hong pai mah bang in tuni kum 27 a cin kum tak ciang in teeltuam nu pa kop 95 pha lian hi.
Pasian thu um thu zui mi te in Pasian tung ah lungdam lua a hih man in tu kei ma min tawh min tapna hong pia uh aa,tu 16 a om laitak hi.ka tu 16 a phak laitak hi.tua mah bang in thu um thu zui mi te tung ah Pasian nasep na tawh ki zui in min phuah na Pasian min tawh min ka phuah min 138 a phak laitak hi.
Pasian in leitung mihing te nuntaakna a ki khek sak ding bang hang ki khek ding Pasian in abawl sa te ama kiang a ciah kik ding deih in ah, a bawl sa bang a ciah kik theih loh ciang in nuntaakna ki khek theilo a hih man in a ki khek kik ding deih hi.a ki khek kik ding a deih tak ciang in Pasian in a zatmi te hong sawl aa,ut pipi aa zong ki sem lo hi,Pasian deih na bang in a ki mang hi.Pasian deih na bang in hong pian tak ciang in tu tung Pasian zatmi te ni kum 27 cin na ah Pasian zatmi te zong thum a hih mah bang in teeltuam nupa zong kop thum hong hi mawk hi.
Pasian in a nasep na te khawl ngeilo,tawp ngeilo, bei ngeilo,nusia ngeilo a hih mah bang in Pasian in na khempeuh tung ah nungta hi.a nungta Pasian na sung ah nungta hi.tua a hih mah bang in u te nau te la nambat 28 na sung ah simlei miza mim bang pian na sian munzang nem dildial ci hi.leitung mi khempeuh a pian na pen vangam siangsawn vantung gamnuam hi ci hi.a ma vangam pan a pian sak mi te tuni in a zat mite ni nang zong leitung pan na pian khiat zawh Pasian in hong zawhpih khit ciang in vantung thusiangtho na zuih hilhkik na hong pai tak ciang in kum bang zah phata na hiam cih tuni na en lecin hilhkikna na san zawh vantung thusiangtho na zuih zawh kum bang zah hiam?nang ii zuih zawh zahzah kum tuni a ki bawl a hihi.
Tua a hih mah bang in simlei miza mim bang pian na sian munzang nem dildial leitung mihing te vantung Pasian gamnuam pan piang hi cihi.tua a hih mah bang in, na zi na pasal na sung aa piang na ta,na mo,na mak vantung pan in nang aa ding aa, a piang a ki teel ngiat nang aa ding hi.nang aa ding hi ziau hi.nang aa ding in a piang khat om aa tua in a piang sak pan nang aa ding a koih hi in nang a ding in na ngah ding aa a gel pan, a gel sa a hihi.tuni tua zatmi te ni a ki bawl a hihi.
Leitung ah na khempeuh bawl khol in tua teng khempeuh a phat ding in Pasian in vantung pan a gel kholhsa mi te leitung ah aki pai hi bek hi.tua a hih man in tuni in na pasal, ka pasal aw cih ding Pasian in phallo aa ka lutang aw ka nuntaakna lutang aw na cih ding Pasian in phal bek hi.ka zi aw na cih ding a phal hang in huh ding na hih na tawh phal hi.tua a hih mah bang in leitung ah a gel tawm hilo in vantung pan a gelsa te a piang khia a hihi.innkuan ding in Pasian in a gel kholh sa a hihi.tua a hih man in Pasian gel kholh na sa te kua man nial zolo ding hi.tua a gel na te khempeuh phatni zatmi te ni a hihi.tua a hih man in ih pasal ding ih zi ding ih ta ding ih tu ding innkuan pih ding te Pasian in a gel kholh sinsen, a ki ngah a hihi.a theih loh a muh lo kawmkal aa piang hi lo hi.ki lawm a sak penpen teng mah innkuan khat aa hong koih a hihi.tu hong koih hong gawm mi te ni zat mite ni a ki bawl a hihi.Pasian hong zat mite ni a ki bawl a hihi.
Tua a hih mah bang in na ki lawm na Pasian mai ah lak in,na et lawm na Pasian mai ah lak in, Pasian in et lawm a sak na thu Pasian mai ah lak in,a man hi pen a mu nuam tawntung hi.tua bek tham lo in na lah ding in zingsang tung in hong pai in no te ki lawmna,na innkuan tawh na ki lawmna kong mu nuam tawntung aa amasa penpen piak khiatna ka deih hi.tua in na ki lawm na tawh nong lak ding uh hi.a masa penpen lungsim piak khiat na,a masa penpen piak khiat na ki ap na sum pi ih piak khiat khit ciang in ei aa ki sem thei hi.tua a hih mah bang in na ki lawm na uh tawh kei kiang ah hong pai unla,no te kong gawmsa te tawh note na ki lawm na te ka mai ah na nuam ding uh hi.na ki-it na te uh ki bang sak un,tua te tawh hong pai un ken tua te muhnop ka sa pen aa thupi ka sa penpen hi.tua a hih mah bang Pasian in a ki lawm a sak penpen tawh tuni in a ki om khawm a hihi.
Pasian in leitung ah nang lian khat bek na bawl hi,ki sun cih bek om aa nang lian a dang omlo hi.tua a hih man in Pasian letsong hi.na nu na pa,na zi na pasal,na tu na ta na sungh,na mak nang aa ding aa Pasian letsong hi.tua pen leitung na tawh a ki lei thei na hilo,a ki lei zo ding zong hi lo,a ki zuak zong hi lo,Pasian in a gawm aa hong gawm hi lel hi.gawm cih teh gawm teel cihteh tel hi.leitung ah nang lian khat bek hong bawl hi. tua a hih man in na pumpi bawl sia ken, gensia ken,na pumpi na bawlsiat leh mawhna hi.tua a hi man in bawlsia ken simmawh ken, gensia ken.
Leitung na nusiat takciang in nang aman hi cin aa, a mah bang khat om lai ei cih bang omlo in, nang tawh ki sai aman,tua ahih man in leitung mihing te in si kici,Pasian in ciah cihi.mihing lei ah a tuh takciang in sihgui ni ci in,Pasian in a gen ciang in ciah ni leh thuciam piak ni ci tektek hi.vantung pan thuciam ngahsa te in vantung nong ciah uh ciang vantung pan thuciam na pia ding uh hi ci bek hi.tua a hih mah bang in hih thuciam ngahsa te vive ih hih man in Pasian teelmi,Pasian gawm mi,Pasian zatmi,Pasian it mi,Pasian deih mi vive ih hih man in tu in nang zong na inn kuanpih te a ding in letsong khat na hih lam ki tel in.na innkuan pih te mai ah mi thupi mahmah na hih lam kitel in.nang ki tel in na innkuan pih te a ding in a manpha in uk tawntung in,na innkuan pih te aa ding in Pasian mai ah a manpha in om tawntung in.na pumpi it tak mahmah hi.leitung ah mi a hinsawt penpen ni 30000 bek ki nungta hi.tua a hih man in leitung ah hun tampi ki ngah lo in Pasian hun ih pumpi ih piak di lo buang a dang omlo hi.
Na zi na ta te gen loh na mawtaw te na puan te na phim na ngawn na innkuan pih hi.Pasian hong piak hi.na zat theih kei na phim na ngawn in hong dawt thei hi.na innkuan pih na neihsa khempeuh Pasian hong piak hi nuam un.no te leitung ah hong pai in man kong la kei hi.man la lo cih pen letsong hi.na pumpi Pasian in it mahmah hi nang sang it zaw lai hi.
Tu in Pasian zatmi te ni hong tun mah bang in bang teng ah eite hong zang nuam mihing khat sung ah bang teng a man nei,bang teng en nei,bang teng ih sung ah om,mihing khat sung ah nuntaakna a kicing koih zo ing ci hi.tu ni in na sung ah thupha na piak zahzah na sung ah om hi.na ganhing tung ah lawng aa thupha na piak ciang in na ganhing ten hong it aa hong cidam bang mah in na it zah thupha tawh a mah a khan a nuam a hihi.
Tua a hih man in hih na khut kuak muan huai sung ah thupha ki cing hi,om hi,a bei theilo thupha hi cihi.tua a hih mah bang in a luzang ah na khut nga in la thupha pia in bei theilo hi.a bei thei ding na sak leh a bei theilo hi,tawp hun zong neilo hi,tua thu pha pen leitung ci leh sa pan in thupha na piak khit tak ciang in vantung thuciam na ngah tak ciang in vanmisiangtho in kum 300 bang zui hi ci hi.
Tua khit tak ciang in phat na la sa aa na phat zah ii na lungdam zahzah tua misiangtho te ii khasiangtho nuntaakna sung ah na lungdam zahzah khasiangtho lungdam hi.khasiangtho lungdam a hih man in khasiangtho in gen hi,khasiangtho in lungdam na a gen ciang in mihing te in a zak loh hang in mihing te tung lungdam na thu tawh gamta a hih man in khanlawh na piang hi.tua khankawh na a piang pen khasiangtho in a gen thu hi.tua a hih man in phat na la a ki sak ngekngek na pen hih hang hi.
Tua ahih man in Pasian kamsang pipa in a ma om muan thu a nget tak ciang in a ma ii sam khah aa a mah kia mah in thu ngen in a mah kia mah in khut lam in thupha leitung buppi a ding pulpi dal na, natpi dal na,tuicin dal na,na sia tak in bawl den hi.tua a hih mah bang in a ma aa ding bek hilo in leitung buppi a ding in thu ngen aa tu ni in zong na zi thupha na piak pen leitung buppi te a ding thupha piakna khat hong suak hi.na ta thupha na piak pen leitung buppi a ding thupha piakna hong suak hi.bang hang hiam cih leh mi khat a picin tak ciang in siavuan,siamah,sangsia cih bang teng a suah tak ciang in mi khempeuh in tua lungdam na ngah hi.leitung buppi a ding hi.tua a hih man in thupha pia in.
Zatmi te hong pai ciang in sanginn sung tausang minphat na Lailui khua ah ki bawl masa hi.puan paak ki khung in Pasian Tapa man ki suang hi.gah leh teh tawh minphat na hi bang dan hi,lei pan aa piang tui tawh a nunta paak tawh min phat hi bang dan hi ci in ki zang hi.tua khit ciang in inn sung tausang minphat na sia Hau Pian te inn ah ki bawl masa hi.tu in ka zatmi pa aw va pai in ka thuciam bang in na sep ding tausang minphat na va bawl in ci a hih man in sia Hau Pian te inn ah ki bawl hi.tua khit ciang in amunmun a khua khua ah ki pai kawikawi in minphat na tausang ki bawl kawikawi hi.tu ni in tausang lungdam na thu na lungdam zah nang aa ding a hihi.tua a hih man in hih lungdam na thu tu ni aa hong pai mi khempeuh aa ding hi.tua a hih man in tu aa hong pai mi khempeuh zong tua thupha a ngah ding hi.Pasian in a gel sa bang in piang sak a hih mah bang in tuni in zatmi te ni a bawl ih hihi.
Tu tung Pasian zatmi te ni ih bawl aa,tun mai ah hong kalsuan pih na ding ah tu ni in kum 27 a khat vei hong cin na a hih mah bang in 1995 a pat teeltuam nupa 95 a cin na a hih mah bang in tun khenpi nih na a ki pai ding a hih mah bang in,khenpi nih na a pai ma in nungak siangtho te kiang ahi zong in siampi lian te kiang ahi zong in,sawltaak te tung ahih zong in teeltuam nupa sazian a ki pia sa a lui te letcian teng ki sian ding a hihi.
A toh nih na khenpi nih na ah a ki pai ding a hihi.bang hang hiam cih leh Pasian gen kholh sa,Pasian ciam sa mah bang in tu ni in hih Pasian gen te zang lo ding ih hi hiam?Pasian ciam kholh sa bang in piang hi,tunglo ding in ih up kawmkal ah Pasian hilhkik zawh kum 20 hong cin khit tak ciang in Pasian in mangngilh hi ta ding hi ci aa ih lam et kawmkal ah hong tung aa tutung teeltuam nupa suah na dongh ah zong hih moelin nupi teng a na cial ngiat hing.a tatak in ci leng gambup khangno te ding kimlai pen Pasian ciamsa tektek bang in hong tung takpi a hih man in gambup ki khoppi ki samlo aa,moelin nupi upa teng teeltuam nupa suah na ah lam na phat na hong bawl ding hi ta hi.tua lai ah Pasian thusin mision te tawh a phat khawm ding hi lai hi.
Thuzui mi ten ah Pasian kamsang pa leh naupang te thu hong sin khawm ding hi cita,thu ki ngen pah ziahziah Pasian siangsawn khuapi miphatna tausang pan naupang te leh Pasian kamsang pa thusin khop ding pen ka nial uhhi,ka nial uhhi.upa te mah hi hen makai te mah hi hen. ka nial uh hi ci ziahziah.awng ziahziah lel,lei bang tuan ziahziah ka nial hi ci kei.Pasian in ka ciam bang in tung ding hi ci lian, a hun tak ciang in hi aa naupang no te hong hi takpi hi.Pasian ciamsa mah bang in tutung mision te mahmah zong naupang no te vive mah hong hihi.
A hong pai lai ding te khempeuh ah zong Pasian in nang tung ah hong gen kholh sa te Pasian tung ah thu nget na te tung pelmawh ding hi.tung taktak ding hi. misiangtho te aw hih zatmi te ni sung ah vantungmi te dawn un,vantung galkap te dawn un,na thunget na sung aa na muh kholh na te khempeuh Pasian khawl ngeilo ding hi.tawp ngeilo ding hi.Pasian hong muh kholh sak na te khempeuh bei ngeilo ding hi.tawp ngeilo ding hi ci in na lungkham khol kei un la,ei ih tawp khak ding lung kham zaw un.Pasian khawl ngeilo dinghi,tawp ngeilo ding hi,tua hun tak ciang in khangthak te na sep na tampi hong piang ding hi.lamdang lungdam na tampi hong piang di hi.tua a hih man in misiangtho te tung ah Pasian in na hong sem ding hi.misiang tho te tung ah khanlawh na tampi hong piang lai ding hi.misiang tho te sung ah khasiangtho nasep na tampi hong piang lai ding hi.khenpi nih na lut ding hi pan in ah tung hi nailo hi.Pasian ciamsa hong piang ding hi.
U te nau te aw khang thak te aw tu in Pasian nasem ding leh Pasian mizat ding leh,Pasian tel ding leh misiangtho ding hing ci in nuam khol un.kei ma sung pan aa piang ka tu ka ta te Pasian mizat piang ding aa,Pasian nasem piang ding aa,Pasian mi lamdang piang ding hi ci in nuam khol un.Pasian khasiangtho no te sung ah hong lut ding hi.nu te pa te aw ka suan ka khak ka u ka nau ka sanggam te Pasian telmi suak ding hi ci in nuam un.Pasian in pilna zong ding leh hi ciang bek aa nasem ding in hong deih hilo aa ih thu nget na sung ah lei mong khat pan lei mong khat ah gam mong khat pan gam mong khat cih ih nget sa hi.tua mah bang in Pasian kamsang pi pan 1922 kum lailui khua pan Mualbem khua a zuat khit vaikhak na kammal thupi hi.ka thu in lei mong khat lei mong khat,gam mong khat leh gam mong khat hong zel ding hi.hi thu ciamteh un.ci in na vai khak hi.
Tua a hih mah bang in khangthak Pasian nasem,khang thak Pasian thu um mi ten na om na khempeuh Pasian nuntaakna sung ah cihtak na lungsim nei un.ka sung ah Pasian nung ta aa kei Pasian zatmi khat ka hihi.tua a zat mite hong zat mi te ni a ki bawl takpi na hi mawk in hilhkik na sung ah na ki tel zah zatmi te ni nang leh kei a ki bawl khawm a hih mah bang in ih suan ih khak te zong Pasian in bang zah aa zangh ding en tello, a thei Pasian hi.na theih nailoh a piang lai ding Pasian in a gel kholhsa hi.tua ahih mah bang in koi mun koi gam na tung a hi zong in siangsawn nuntaakna sung ah citak in,siangsawn nuntaakna sung ah nungta in,a siangtho nuntaakna tawh nungta in,Pasian in a ciamsa khel ngeilo hi.Pasian in a ciamsa a khel loh mah bang in ka neulai ka kum 5/6 Tonzang khua ah ka om laitak in Pasian siangsawn khua Pasian in hong musak hi.a mit hum,munuamlo,nial,ka nun bang hong ci hiam cih leh Mangneu aw na mit na hum bang dan aa, ken muh khat nei tua hi,ka nun sunglut hongsa a hih ciang aa,ak kang sa hong pia,manta pum em hong pia,sing awn nuai ah hong lut pih,ken Pasian thupiak genlo,Lailui inn ka et leh khuamu lian ih gamtat na ding khempeuh mu ka hih ciang aa ka lau dan,lai sim kim lai ut keng va ci kha ka hih ciang aa,ka lawm te kei pen mihai hong ci lian hi.ka gengen leh gen nawn kei o, im cip oo hong ki ci a hih man aa ka im cip bekbak hi.
Ka kum 12 tak ciang in tua ka muh na ci in ka u Go Suan Pau ka gen leh thei lian ing ei Teeklui khua khung hi ei ci in hong paipih in na hi lian hi.tua lai aa bual tui kicing sakol leh bawng ten na ne.tua pan in ah ciah in ah Sing At Mual ka tun tak ciang in U Pau aw hi lai ah khua thak hong piang ding hi.’’ih khuapih te lau aa hong suktai khin hi piang ken teh hong ci’’piang ding hi tua lai ah taklak ah ken inn lam masa pen ding hing.a tatak hong pianteh ken inn lam masa pen takpi in khuapih ten Mangneu ten tua lai ah inn lam zen mihai te hong ci hi.bangbang hi ta leh Pasian ciamsa bang in Sing At Mual(MunPha)to teng ah inn hong dimta hi.siangsawn khua ah Pasian ciamsa bang in piang aa Pasian ciamsa bang in hih moelin,piang hi.Pasian ciamsa bang in TanNuamZang piang hi.Pasian ciamsa bang in LuiZang piang hi.Siangsawn khua tui om na pen ki dawn in tua pen tu in အသည္းနလံုးေရကန္ki ci hi.Pasian kamsangpipa lungtang leh mizat kamsang pa lungtang ci in ki ciamteh hi.
Tua ahih mah bang in hi te khempeuh tawh na a sem khawm kua?mingsiangtho te hi.misiangtho ten ah neih leh lam teng khempeuh ih khua aa teng khempeuh nusia aa siangsawn khua a pai tak ciang in inn neilo dan khat aa om khinkhian huih in sukmut to mut,tua kawm pipi mah aa khualzin vak,Cing Kuak in ah tua pen la khat hong phuak demdam.tua teng ah teeltuam nupa piang veve,a ki letthat te kiang ah Pasian in lei pan aa piang gah leh teh ne un ci in,a gah leh teh theilo ih hih ciang aa,moh leh niangtui ne,misiangtho te aw hi thu ngaihsun un tun teeltuam nupa te in lei pan a piang gah leh teh tawh ih sanggam ih u ih nau te tawh ne khawm ding hi ci hi.
Pasian in hong kalsuan pih nuam hi tu in khenpi nih na ah hong lut pih ding hi.tu aa khang thak te in ko hun tak ciang in Pasian deih na gah leh teh tawh pai nuam hi ci in khen sat un.Pasian in siangtho nuntaak na mah deih hi.teltuam ni tak ciang in gah leh teh nek khop na,min phat na hong om ding hi.tua ciang in namkhat bek hong hi ding aa khat teh khat mah hong hi ding hi.a bei sa hun in bel ki deih sak lua in a mimbem a tang bem aa ki sun in tua bang om ngei lo hi,Pasian in gen un ci a hih man in a gen ih hihi.tua a hih mah bang in Pasian in kalsuan pih aa hong nuntaakpih Pasian nang leh kei,nang leh Pasian nungta tatak hi ci in Pasian sung ah ih nuntaakna lak khia ding hi hang.ih u ih nau te tung ah zong lak khia ding hi hang.thu um misingtho te tung ah zong ih up na tantan Pasian tawh ih nuntaakna lakkhia ding hi hang.ih lah khiat zahzah Pasian aa ding leh nang aa ding hi.
Pasian kamsangpa thugen na
